தேர்தல் முடிவுகள் - சில குறிப்புகள்

தமிழகத்தில் வாக்களிப்புக்குப் பிந்தைய கருத்துக்கணிப்புகள் சொன்னது போலவே திமுக கூட்டணி அதிகமான வாக்குகள் பெற்றிருந்தது. காங்கிரசு பெருந்தலைகளுக்குப் பின்னடைவு, மணிசங்கர அய்யர், தங்கபாலு, பிரபு, ஈவிகேஎஸ் இளங்கோவன் எல்லோரும் தோற்பார்கள் போலத் தெரிந்தது. ப சிதம்பரம் தோற்று விட்டதாக செய்தி வந்த பிறகு மறு எண்ணிக்கை, மறு முறையீடு என்று முந்தி விட்டார். காலை நாளிதழில் முடிவு அவர் வெற்றி என்றுதான் போட்டு விட்டார்கள்.

பாமக எந்தத் தொகுதியிலும் வெற்றி பெற முடியவில்லை. விடுதலைச் சிறுத்தைகள் கட்சியின் திருமாவளவன் வெற்றி பெற்று விட்டார். பாஜகவின் கனவுகள் கன்னியாகுமரியிலும், ராமநாதபுரத்திலும் கலைந்து போயின. திமுகவின் ஹெலன் டேவிட்சன் ஒரு லட்சத்துக்கும் அதிகமாக வாக்கு வித்தியாசத்தில் கன்னியாகுமரியிலும், திடீர் ஹீரோ ரித்தீஷ் ராமநாதபுரத்திலும் வெற்றி பெற்று விட்டார்கள்.

பெருந்தலைகள் டி ஆர் பாலு, அழகிரி, ராஜா, தயாநிதி மாறன் வெற்றி பெற்று விட்டார்கள். தா பாண்டியன், வைகோ மண்ணைக் கவ்வி விட்டார்கள்.

1. மதவாதக் கட்சிகளின் பிரச்சாரம் எடுபடாமல் போனாலும்,

• கர்நாடகா, குஜராத், இமாச்சல பிரதேச மாநிலங்களில் உறுதியான வெற்றியையும்,
  
• மத்தியபிரதேசம், ஜார்கண்டு, உத்தரபிரதேசம், மகாராஷ்டிரம் போன்ற மாநிலங்களில் போட்டி போடும் வலிமையுடனும்,
  
• பீகார் மாநிலத்தில் கூட்டணி ஆதரவிலும்
  இன்னும் தளைத்துக் கொண்டுதான் இருக்கிறார்கள்.
  
  
• ராஜஸ்தான், தில்லி, ஜம்மு காஷ்மீர் பெரும் பின்னடைவு.
  
• மேற்கு வங்கம், தமிழ்நாடு, ஆந்திர பிரதேசம், கேரளா போன்ற மாநிலங்களில் வாலாட்டுவது பெருமளவுக்கு எடுபடவில்லை.
  

2. காங்கிரசு கட்சிக்கு

• உத்திரபிரதேசம், தில்லி, ராஜஸ்தான், ஆந்திர பிரதேசம் (குறைந்த அளவில்) ஆகிய நான்கு மாநிலங்களிலும் தனி வெற்றி.
• மேற்கு வங்கம், தமிழ்நாடு, காஷ்மீர் மாநிலங்களில் கூட்டணி வெற்றி.

3. மாயாவதியின் அகில இந்திய கனவு பொய்த்துப் போய் விட்டது. இந்தப் பாடத்தை எடுத்துக் கொண்டு ஆட்சியை இன்னும் மேம்படுத்தினால் அடுத்தடுத்த தேர்தல்களில் வாய்ப்புகள் மேம்படலாம். அகில இந்திய அளவில் ஒத்த நோக்குடைய கட்சிகளுடன் கூட்டணி வைத்துக் கொள்ளவும் இறங்கி வர வேண்டும்.

4. பொதுவுடமைக் கட்சிகள் மேற்குவங்கத்திலும், கேரளாவிலும் தமது பிடியை வெகுவாக தளர விட்டிருக்கிறார்கள். சமாளித்து தலையெடுப்பது பெரிய சவாலாகத்தான் இருக்கப் போகிறது.

5. திமுக அரசை நீக்க வேண்டும், மாயாவதி அரசை நீக்க வேண்டும் என்உற மிரட்டும் கூட்டணிக் கட்சிகள் மத்திய அரசில் செல்வாக்கு பெற முடியாது. மம்தா பானர்ஜி மட்டும் மேற்கு வங்க அரசுக்கு எதிராக மத்திய அதிகாரத்தைப் பயன்படுத்த முயற்சிக்கலாம். சோனியா காந்தியின் ஜனநாயக உள்ளுணர்வு அதற்கு இடம் கொடுக்காது என்று நம்பலாம்.

6. நரேந்திர மோடி, குஜராத்தில் போன தடவையை விட ஒரு இடம் அதிகம் வெற்றி பெற செய்திருக்கிறார். 'தோல்விக்குக் காரணம் அத்வானிதான், மோடி பாணி வெறுப்பு அரசியலைத் தீவிரப்படுத்தினால்தான் வெற்றி பெற வாய்ப்புகள் அதிகரிக்கும்' என்று கட்சி முடிவு செய்தால் அவரது முக்கியத்துவம் அதிகமாகலாம்.

7. பாமகவை எப்படியாவது தோற்கடித்தே தீருவது என்று செயல்பட்ட திமுக பணபலத்தின் முடிவாக பாமக 6 தொகுதிகளிலும் மண்ணைக் கவ்விய நல்லது நடந்திருக்கிறது. இரண்டு தீய சக்திகள் மோதிக் கொண்டால் குறைந்தது ஒன்று ஒழிந்து விடுகிறது. குடும்ப அரசியல், பணத் திமிர் என்று செயல்பட்ட திமுகவின் அலட்டல் இன்னும் அதிகமாகும்.

8. ஜெயலலிதா தனது உயர் குதிரையிலிருந்து இறங்கி வர வேண்டியிருக்கும். விஜயகாந்தின் கூட்டணி கிடைத்தால்தான் அடுத்த சட்டமன்றத் தேர்தலில் வாய்ப்புகள் அதிகமாகும். அதிலும் தனியாக விஜயகாந்த் நின்று, திமுக/காங்கிரசு கூட்டணி தொடர்ந்தால் விஜயகாந்த் பேர் சொல்லுமளவுக்கு இடங்களில் வெற்றி பெற்று மற்ற இடங்களில் திமுக எதிர்ப்பு வாக்குகளைக் கொண்டு போய் விடுவார். அதே உறுதியுடன் தனித்துச் செயல்பட்டால் 2016ல் விஜயகாந்துக்கு வாய்ப்புகள் ஏற்படலாம். இதற்கிடையில் என்னென்ன மாற்றங்கள் வரப் போகின்றனவோ!

9. அனைத்து மதங்களையும் அணைத்துச் செல்ல வேண்டும் என்ற இந்திய கோட்பாட்டுக்குக் கிடைத்த வெற்றி தேர்தல் முடிவுகள். உபியில் மாயாவதி, ஆந்திராவில் சந்திரபாபு நாயுடு, தமிழ்நாட்டில் செயலலிதா மூவருமே வாய்ப்பு கிடைத்தால் பிஜேபியுடன் சேர்ந்து கொள்வார்கள் என்ற எண்ணம் பரவலாக இருப்பதால் சிறுபான்மை மதத்தினர் வாக்களிக்க விரும்பவில்லை.

கன்னியாகுமரி தொகுதியில் திமுகவின் ஹெலன் டேவிட்சனுக்கு வாக்களிக்குமாறு முடிவெடுத்தார்களாம். கம்யூனிஸ்டுகளை ஒதுக்குவது என்று கேரளா முடிவெடுத்த பிரதிபலிப்பு கன்னியாகுமரியிலும். திமுக காங்கிரசுடன் சேர்ந்திருப்பதான் பாஜகவுடன் உறவாடிய பாவத்தைக் கழுவிக் கொள்ள முடிந்தது. இது வரை உறவாடியவர்களுக்கும், இனிமேல் சேர்ந்து கொள்ள நினைப்பவர்களுக்கும் கடுமையான எண்ணத் தடையை உருவாக்கக் கூடிய முடிவுகள்.

சோ ராமசாமிக்கு ஈழத் தமிழர் பிரச்சனைக்கு தமிழகத்தில் தாக்கம் இல்லை என்று தான் சொன்னது நிரூபிக்கப்பட்டு விட்டது என்று மட்டும்தான் சொல்லிக் கொள்ள முடியும். பாஜக 170, 200 என்று பேசிக் கொண்டிருந்தது, திமுக செல்வாக்கை அதிகப்படுத்திக் கொண்டது எல்லாமே கசப்பு மருந்துகள்தான். அதிலும் விஜயகாந்தின் தேமுதிக வாக்குகளைப் பிரிப்பது திமுகவுக்கு சாதகமாக அமையும் என்று தான் சொன்னது நடந்திருக்கிறது என்று சொல்லலாம்.

மற்றபடி பாஜகவுக்கு ஒரு சில மாநிலங்களில்தான் பின்னடைவு. காரணங்களை ஆராய்ந்து செயல்பட்டால் அடுத்த முறை வெற்றி பெற்று விடலாம் என்பார். போன தேர்தலிலும் அதையேத்தான் சொல்லியிருந்தார்.