பொருளாதார மேம்பாட்டு சாத்தியங்கள்

1. பராக் ஒபாமாவின் நிர்வாகத்தில் பெரு வணிக நிறுவனங்களுக்குச் சாதகமான கொள்கைகள் பின்பற்றப்படாது. பரவலான பொது மக்களுக்கு, ஒடுக்கப்பட்ட மக்களுக்கு பலனளிக்கும் நடவடிக்கைகளைத்தான் எதிர்பார்க்கலாம். அதனால் இந்தியாவிலும், வியாபாரிகள், பெரு நிறுவனங்கள் சார்ந்த பொருளாதாரத்துக்கு நிவாரணம் சீக்கிரம் கிடைத்து விடாது.

2. அடுத்த நாடாளுமன்றத் தேர்தலுக்குப் பிறகு கலவையாக ஒரு கிச்சடி அரசு அமைவது வணிகர்கள் சார்ந்த கட்சிகளான பாசக அல்லது காங்கிரசு தலைமையில் அரசு அமைவதை விட நல்லதாகவே இருக்கும். மும்பை பங்குச் சந்தைக்கும், பன்னாட்டு நிறுவனங்களுக்கும், எகனாமிக் டைம்சு படிப்பவர்களுக்கும் சாதகமான பொருளாதார நடவடிக்கைகள் எடுக்கப்படாமல், கிராமத்து மக்களுக்கும் ஒடுக்கப்பட்ட மக்களுக்கும் சாதகமான நிர்வாகம் அமையலாம்.

3. Wealth at the bottom of pyramid என்று சி கே பிரகலாத் சொன்ன மந்திரத்தைப் பிடித்துக் கொண்டு ஒரு ரூபாய் சாம்பூ பொதி, 2 ரூபாய் துணி துவைக்கும் பொடி பொதி என்று பன்னாட்டு நிறுவனங்கள் கிராமத்து நுகர்வோரை நோக்கி சந்தைப்படுத்தலை திருப்பின.

அதைப் போல, வணிக நிறுவனங்களுக்குச் சாதகமான கொள்கைகள் மட்டும்தான் பொருளாதாரத்துக்கு நல்லது என்ற கடந்த 30 ஆண்டு கால உலகப் பொதுப்புத்தியை விடுத்து, ஏழைகள், பொருளாதார ஏணியில் கீழ்ப்படிகளில் இருப்பவர்களுக்கு சாதகமான கொள்கைகள் சமூகத்தை உறுதி பெறச் செய்யும் என்ற எம் ஜி ஆர் பாணி அரசியல், அமெரிக்காவில் 1930களில் அதிபராக இருந்த பிராங்கிளின் ரூஸ்வெல்ட் பாணி பொருளாதார அரசியல் இந்த நூற்றாண்டின் இரண்டாவது பத்தாண்டில் தேவையான நடவடிக்கைகள்.

அமெரிக்காவில் முந்தைய சனநாயகக் கட்சி நிர்வாகமாக பில் கிளின்டன் ஆட்சி செய்த போதும், பிரிட்டனில் தொழிற் கட்சி ஆட்சியின் தலைவராக டோனி பிளேர் இருந்த போதும். அந்தக் கட்சிகளின் பாரம்பரிய பொருளாதாரக் கொள்கைகளை கிடப்பில் போட்டு விட்டு வணிகர்களின் நல ஆட்சியே நடத்தினார்கள். அது மாறி உண்மையான சனநாயகக் கட்சி, தொழிற்கட்சி ஆட்சி வாய்ப்புகள் ஏற்பட்டுள்ளன.

அமெரிக்காவில் பராக் ஒபாமாவும், பிரிட்டனில் கார்டன் பிரௌனும், இந்தியாவில் மாயாவதி/பொதுவுடமை கட்சிகள்/சமூகவாதக் கட்சிகள் கூட்டணியும் இத்தகைய கொள்கைகளை கடைப்பிடிப்பதற்கு பொருத்தமானவர்கள்.

இந்தியாவிலும், தமிழகத்திலும் அதே போல மாற்றங்கள் ஏற்பட வேண்டும்.

திமுகவை விட்டால் மாற்று அதிமுக என்று ஆயாசம் அடைய வேண்டாம். நாமெல்லாம் மனதளவில் தயாராகும் போது அதற்கான தேர்வு மிக வேகமாக வந்து விடும். பராக் ஒபாமா இரண்டு ஆண்டுகளுக்குள் அரசியல் மேடையில் வெளிச்சம் பெற்று அமெரிக்க அதிபராகி விட்டது போல, மக்கள் கருத்து திருப்பம் பெற்றதும் திமுக/அதிமுக, காங்கிரசு/பாசக அரசியலுக்கான மாற்று கிடைத்து விடும்.

சோவியத் புரட்சிக்குப் பிறகு இரண்டு மாதங்களுக்குள் லெனின் அதன் தலைமைப் பொறுப்பை ஏற்று அடுத்த ஆறு மாதங்களுக்குள் ஆட்சிப் பொறுப்பை சோவியத் ஏற்க வைத்தாராம். மாற்றங்களுக்கு சமூகம் தயாராகும் போது அதற்கான தேர்வுகளும் உருவாகி விடுகின்றன.

கண்டனத்துக்குரிய டோண்டு ராகவன்

மூன்று ஆண்டுகளுக்கு முன்பு இந்த வலைப்பதிவை ஆரம்பித்ததும் ஆரம்ப இடுகைகளில் ஒன்று, டோண்டு ராகவனின் சாதி அமைப்பைத் தூக்கிப்பிடிக்கும் போக்கைக் கண்டிப்பதாக இருந்தது.

இப்போது மீண்டும் ஆரம்பித்து விட்ட அவரது கருத்தாக்கங்களை வன்மையாகக் கண்டிக்கிறேன். டூண்டு என்ற பெயரில் அவரைத் தாக்கி அடக்கி வைத்திருந்தவரின் முறைகள்தான் சரியோ என்று தோன்றுகிறது.

குமுதம் என்ற வருணாசிரம ஆதரவுப் பத்திரிகையில் வெளியிடப்படும் கட்டுரைகளைத் தமக்கு தூண்டுதலாக அவர் சொல்வதில் இருக்கும் அவலம் நமது சமூகத்தில் புரையோடிக் கிடக்கும் நோய்களின் முதல்.

டோண்டுவின் கருத்துக்களை தேவையில்லாமல் இணைத்து விளம்பரம் கொடுப்பதாக இருந்தாலும், கசப்புடனேயே இந்த இடுகையை வெளியிடுகிறேன்.

ஆணும் பெண்ணும்

'எதற்காக இவ்வளவு ஓட்டங்கள்'. வெறும் உடலியல் இயற்கையை மட்டும் வைத்துப் பார்த்தால் உலகில் பெண்களுக்கு ஆண் விகிதம் குறைவாகவே போதுமானது. எதிர்மறையாக ஒரு ஆணுக்கு ஒரு பெண் என்ற விகிதாச்சாரத்தை விட பெண்களின் எண்ணிக்கைக் குறைந்தே காணப்படுகிறது.

அடிப்படை உணர்வுகள் என்னென்ன?

ஒரு ஆணுக்குப் பெண்ணைக் கண்டதும் ஏற்படும் இச்சை
பெண்ணுக்கு ஆணைக் கண்டதும் ஏற்படும் ஆசை
வயிற்றுப் பசி
குழந்தைகள் மீது ஏற்படும் பாசம்
சக மனிதன் துன்புறும் போது ஏற்படும் துடிப்பு
பிற உயிர்கள் மீது ஏற்படும் அன்பு
மேலும் மேலும் மேம்பட வேண்டும் என்ற ஓட்டம்
இறவா வரம் வேண்டும் என்ற உள்ளுணர்வு

இவை எல்லாம் மனிதர்களை வரையறுக்கின்றன. தாய் குழந்தையைப் பெறுவதற்கு என்ன உந்துதல். நாய் குட்டி போடுவதற்கு இருக்கும் உந்துதலுக்கும் அதற்கும் அடிப்படையில் என்ன வேறுபாடு? வயது அதிகமாகும் போது தோல் சுருங்கி, நினைவு தடுமாறி இறந்து போகும் போது நமது எச்சங்களை பெருமைப்படுத்துவதற்கு என்று சந்ததியினர் இருக்கிறார்கள் என்ற நிறைவுக்கு மட்டும்தானா அது?

உயிர்ப்பொருட்களை உருவாக்கிக் கொள்வதுதான் நமது அடிப்படை உந்துதல். சூரியனின் ஆற்றலைப் பிடித்து சர்க்கரைப் பொருளாக மாற்றி வைத்துக் கொள்கின்றன தாவரங்கள். ஆற்றல் உயிர்ப்பொருளாக மாறியிருக்கிறது. அந்த சர்க்கரைப் பொருளை சாப்பிட்டு தனது உடலை வளர்த்துக் கொள்கின்றன மற்ற விலங்குகள். அதில் சர்க்கரையை விட சிக்கலான மூலக்கூறுகளுடன் எலும்பும், தசையும், நரம்பும் வளர்கின்றன. மிக எளிதான உயிரினங்களிலிருந்து மிகவும் சிக்கலான உயிர்ப்பொருட்கள் உருவாகும் பரிணாம வளர்ச்சிதான் அடிப்படை உந்துதல்.

சிக்கலான உயிரினங்கள் உருவாவதன் தேவை என்ன? ஆற்றலை உயிர்ப்பொருளாக மாற்றிக் கொண்டு விட்டால் அப்படி உருவாக்கப்பட்ட சிக்கலான உயிரினங்கள் செய்ய முடியும் சாதனைகளின் சாத்தியங்கள் அதிகமாகிக் கொண்டே போகும். மேட்ரிக்சு படத்தில் மிகவும் உயர் நிலையில் இருக்கும் உயிரினங்கள் மனிதர்களின் வாழ்க்கையில் வெளிப்படும் ஆற்றலை தமது தேவைக்காக எடுத்துக் கொள்கின்றார்கள். அதற்காக மனித உலகை இயக்கிக் கொண்டிருக்கிறார்கள் என்று காண்பிப்பார்கள். அது போலத்தானே நாமும் தாவரங்களையும் பிற விலங்குகளையும் பயன்படுத்திக் கொண்டிருக்கிறோம்!

உயிர் நிலையை பெருகச் செய்யும் எல்லாவற்றையும் ஊக்குவிக்க வேண்டும். குழந்தைகளுக்கு நிறைய சாப்பாடு போட்டு கொழுகொழுவென்று வளர்த்தால் மட்டும் போதாது, அந்த வளர்ப்பை இன்னும் சிறப்பாகச் செய்ய புற உலகின் வளங்களை இன்னும் சிறப்பாக எப்படிப் பயன்படுத்திக் கொள்ளலாம் என்று சிந்தித்து அதை மாற்றிக் கொடுப்பதற்கான பங்களிப்பும் தேவை. குழந்தைகளை வளர்க்கும் பொறுப்பு பெண்களிடம் இயல்பாக அமைவது போல புற உலக மேம்பாட்டுகளுக்கான உடல் அமைப்புகள், மூளைத் தூண்டுதல்கள், உள்ளப்போக்குகள் ஆண்களுக்கு அதிகமாக வளர்ந்திருக்கிறது

'இது ஆணுக்கும் பெண்ணுக்கும் எந்நாளும் உள்ள கதை' என்று பாடலில் வரும். ஆணும் பெண்ணும் இணைய வேண்டும், சேர்ந்து வாழ வேண்டும் என்ற உந்துதல் அடிப்படை உண்மை. அதில் இருக்கும் ஆதாயங்கள் ஆணுக்கும் புரிகிறது, பெண்ணுக்கும் புரிகிறது.

பெண்கள் உடலுழைப்பு செய்ய முடியாது என்று ஒரு இடத்தில் எழுதிய போது, 'பெண் பலவீனமாவள், அதனால் உழைக்க முடியாது என்றல்லவா சொல்கிறார்' என்று ஒரு சகோதரி பதில் எழுதியிருந்தார். உடலுழைப்பு என்பது பலம் என்று வைத்துக் கொண்டால் எருமை மாடும் கழுதைகளும்தான் உலகிலேயே பலசாலிகள். அதனால் நாமெல்லாம் பலவீனமானவர்கள் என்று நினைத்து வருந்த வேண்டுமா!

விக்கிபீடியா பயிற்சி வகுப்பு

தொலைபேசியில் ரவிசங்கர் அழைத்து விருகம்பாக்கத்தில் கிருபாசங்கரின் வீட்டில் நடக்கும் விக்கி பட்டறைக்கு வந்திருப்பதாகவும் விசைப்பலகை தமிழ் 99 ஒட்டிகளை எடுத்துக் கொண்டு வர முடியுமா என்றும் கேட்டார். 3 மணிக்கு பட்டறை ஆரம்பிக்கிறதாம்.' 5 மணி வரை நடக்குமாம். 3 மணிக்கே வருவது நடக்காது, முடியும் முன்னர் எப்படியும் வந்து விடுகிறேன்'

ரேமண்ட்சு காட்சிக் கடைக்கு அருகில் காமராசர் சாலைக்கு வரச் சொல்லியிருந்தார். ஆவிச்சி பள்ளி பேருந்து நிறுத்தத்தில் இறங்கிக் கொண்டேன். அருகில் இருந்த ஒரு அங்காடியில் அப்பி ஆப்பிள் சாறு வாங்கி வறண்டு போயிருந்த தொண்டையை நனைத்துக் கொண்டேன்.

போக வேண்டிய அடுக்கு மாடிக் கட்டிடத்தின் பெயரை மறந்து போயிருந்தேன். தொலைபேசி அடித்தால் எடுக்கவில்லை. நிகழ்ச்சி ஆரம்பித்து ஓசை எழும்பாமல் அமைத்துக் கொண்டிருப்பார் என்று ஊகித்தேன். காமராசர் சாலைக்குள் நுழைந்து வலது புறம் முதலில் இருந்த கட்டிடத்தில் கேட்டால் அங்கு இல்லை. தொடர்ந்து நடந்து சாலிக்ராமம் நோக்கிப் போக ஆரம்பித்தேன். தெருவின் பெயரும் மாற ஆரம்பித்தது. அந்த நேரம் ரவிசங்கர் திரும்பி அழைத்திருக்கிறார். ஓசை கேட்டிருக்கவில்லை. நான் அழைத்துப் பேசினால் கட்டிடத்தின் பெயரைச் சொல்லி விட்டார். கிருபாசங்கர் கீழே வந்து காத்திருப்பதாகச் சொன்னார். 'கறுப்பு டிசட்டையும், நீல நிற ஜீன்சும் போட்டிருப்பேன்'

தெரு முனை திரும்பிப் பார்க்கும் போது கட்டிடத்தின் வாசலிலேயே குறிப்பிட்ட நிற உடை அணிந்து நின்றிருந்தவரைப் பார்த்து விட்டேன். என்னைத்தான் அவர் ஊகித்திருக்க முடியாது. அவருக்கு வணக்கம் சொல்லி விட்டு, அறிமுகம் செய்து கொள்ள ஆரம்பித்தவரை, 'உங்களைத் தெரியாதவர்கள் வலைப்பதிவு உலகில் உண்டா' என்று சொல்லி தொடர்ந்தேன். கீழே கிரிக்கெட் விளையாடிக் கொண்டிருந்த குழந்தைகள் அவரையும் அழைத்தன.

மாடியில் வீட்டுக்குள் இரண்டு கணினிகளில் ரவிசங்கரும் இன்னொரு நண்பரும் கூடியிருந்த ஆர்வலர்களுக்கு விக்கிபீடியா குறித்து விளக்கிக் கொண்டிருந்தார்கள். ஐகாரஸ் பிரகாஷ் நீண்ட நாட்களுக்குப் பார்க்க முடிந்தது. நானும் ஒரு நாற்காலியில் உட்கார்ந்து கொண்டேன். அறிமுக நிலை விளக்கங்கள் மட்டும்தான் சாத்தியமாகும் கூட்டம். இணையம், கூகிள் என்று தொடர்பில்லாத திசைகளிலும் பேச்சு நீண்டது.

பட்டறை முடிந்ததும் வந்திருந்த எல்லோரையும் தனித்தனியாக வைத்து புகைப்படம் எடுத்துக் கொண்டார் கிருபா. இது போன்ற நிகழ்ச்சிகள் நடத்தி பல முறை அனுபவம் இருந்ததால் எதை எப்படிச் செய்வது என்று தெரிந்து வைத்திருக்கிறார். கொஞ்ச நேரம் பேசிக் கொண்டிருக்கலாம் என்று மொட்டை மாடிக்குப் போனோம். கூட பிசுகட்டுகள், தண்ணீர் பாட்டில்.

ரவி, சிவகுமார், ஐகாரஸ் பிரகாஷ் என்று 'பிரபல வலைப்பதிவர்கள்' ஒரு பக்கமும், கிருபா மற்றும் இரண்டு நண்பர்கள் இன்னொரு புறமும் என்று ஆறு பேர். விக்கிபீடியா, வலைப்பதிவுகள், டிவிட்டர் என்று பேசிக் கொண்டிருந்தோம். வில்லு படம் குறித்து டிவிட்டரில் தனது பிரபலமான விமரிசனத்தை பிரகாஷ் குறிப்பிட்டு சிரிப்பலைகளைத் தவழ விட்டார். பதிவர் பட்டறை போல விக்கிபீடியா பட்டறை ஏற்பாடு செய்யலாம் என்று பேச்சு வந்ததும், மார்ச்சு 15 என்று கிருபா நாள் குறித்து சொல்லி விட்டார். 'இது போன்ற நிகழ்ச்சிகளுக்கு 2 மாத இடைவெளி சரியாக இருக்கும்.'

'ஆங்கில விக்கிபீடியாவில் தீவிரமாக எழுதிக் கொண்டிருப்பவர்கள் 20 முதல் 25 வயதுக்குள் இருப்பவர்கள்தாம்' என்று ரவிசங்கர் உறுதியாகச் சொன்னார். 'தமிழிலும் அந்த வயதுக் கல்லூரி மாணவர்களை இலக்கு வைத்து பட்டறை, விழிப்புணர்வு நிகழ்ச்சிகள் நடத்தலாம்' என்று பேச்சு வந்தது.

விக்கியில் எழுதுவதற்கு விக்கி மீஉரை தெரிந்திருக்க வேண்டிய தடை குறித்தும் பேசினோம். 'பார்ப்பது போல கிடைக்கும்' உரைத் தொகுப்பி உருவாக்குவதற்கு பணம் ஒதுக்கியிருக்கிறார்கள். அது வந்து விட்டால் இந்த பிரச்சனைக்கு தீர்வு கிடைத்து விடும்'

ஊடகங்களில் வெளிச்சம் போட பாலபாரதி போன்றவர்களை அணுகலாம். கலைஞர் தொலைக்காட்சியில் பணி புரியும் நண்பர் எண்ணையும் ரவிசங்கரிடம் கொடுத்தேன். 1000 நாட்களில் 100000 கட்டுரைகள் என்று முயற்சி ஆரம்பித்த செந்தில்நாதன் தொடர்பையும் வாங்கிக் கொண்டார். எல்லோரையும் சேர்த்து முயற்சி ஆரம்பிக்கலாம்.

ஆறு மணிக்கெல்லாம் விடைபெற்றுக் கிளம்பினோம். கீழே கிரிக்கெட் விளையாட்டு முடிந்து வேறு ஓட்டங்கள் ஆரம்பித்திருந்தன. வெளியில் வந்து ரவி, பிரகாஷிடம் விடை பெற்றுக் கொண்டு ஆவிச்சி எதிரில் பேருந்து நிறுத்தத்துக்கு வந்து பேருந்து பிடித்து அலுவலகத்துக்கே வந்து விட்டேன்.

அமெரிக்க பொருளாதார நெருக்கடி - ஒரு உரையாடல்

'மூன்று மாதங்களுக்கு முன்பு நினைத்ததை விட சிறப்பாகவே சீராகி வருகிறது. தனது வீட்டை விற்று விட்டு காரிலேயே வாழ்க்கை நடத்த ஆரம்பித்திருக்கும் ஒருவரதுப் படித்தேன். அவ்வளவு மோசமான வறுமை.'

'சாப்பாட்டுக்கு குறையில்லை, தங்குவதற்கு கார் இருக்கிறது அது வறுமை என்றால் இங்கு நாம் பார்ப்பது என்ன'

'அப்படி ஒப்பிடக் கூடாது, அவர்களது வாழ்க்கை முறைக்கு அது வறுமைதான்'.

'நிச்சயமாக ஒப்பிட வேண்டும். தேவையான வசதிகள், கூடுதல் வசதிகள் எல்லாவற்றையும் அனுபவிப்பது தமது பிறப்புரிமை என்று ஆடிக் கொண்டிருக்கும் அமெரிக்கர்கள் உண்மையை உணர வேண்டும். அவர்கள் வசிக்கும் அதே உலகத்தில் வசிக்கும், அவர்கள் எடுத்துக் கொள்ளும் அதே வளங்களைப் பகிர்ந்து கொள்ளும் இந்தியர்களையோ சோமாலியர்களையோ அவர்கள் பொருட்படுத்துவது கூட இல்லை. உலகமனைத்தையும் சுரண்டி தமக்கு வேண்டியதை சாதித்துக் கொள்வது என்றிருப்பவர்களுக்காக ஏன் பரிதாபப்பட வேண்டும்'

'சத்தியம் நிறுவனத்தில் அடுத்த மாதம் சம்பளம் கொடுக்கப் பணம் இல்லை என்று அரசாங்கத்திலும் ஊடகத்திலும் மும்முரமாக விவாதித்துக் கொண்டிருக்கிறார்கள். முதலாளித்துவ சந்தைப் பொருளாதாரத்தின் செழிப்பை அனுபவித்தவர்கள் நிறுவனம் சறுக்கும் போது அதன் வலிகளையும் தாங்கிக் கொள்ளத்தான் வேண்டும்'

'அது நிறுவனத்தின் தலைவர் செய்த தவறு. அதற்கு அதன் ஊழியர்களை ஏன் தண்டிக்க வேண்டும். படித்து முடித்த நல்ல வேலைக்குச் சேர்ந்தான். கடன் இருக்கிறது. திடீரென்று வேலை போய் விட்டால் என்ன செய்வார்கள்?'

'அந்த வாழ்க்கை முறை வசதிகளை அனுபவிக்கும் போது மற்றவர்களைப் பற்றி நினைத்துப் பார்த்தார்களா? நமது பெற்றோர்களோ அவர்களது பெற்றோர்களோ இப்படி ஒரு வாழ்க்கை முறை வேண்டும் என்று நமக்குச் சொல்லிக் கொடுத்தார்களா? அமெரிக்க பொருளாதார கலாச்சார ஆதிக்கத்தின் கீழ் கற்றுக் கொண்டு விட்ட நாம் அந்த வாழ்க்கை முறைக்கு அரசாங்க ஆதரவு வேண்டும் என்பது அடாவடித்தனம்'