பசியும் மருந்தும்

சும்மா சாப்பிட்டுக் கொண்டு தூங்கிக் கொண்டு வாழ யாரும் விரும்புவதில்லை. உருப்படியான வேலைகளைச் செய்து தமது முத்திரையை விட்டுச் செல்ல வேண்டும் என்பது மனிதனின் தேவையாக இருக்கிறது.

ஒவ்வொரு நாளும் மனநிறைவுகள் தேவையாக இருக்கின்றன. மன நிறைவுகள் எங்கிருந்தெல்லாம் கிடைக்கும்:

1. நல்ல சுவையான சாப்பாட்டைச் சாப்பிட்டால் மனம் நிறைந்து விடலாம்.
2. மூன்று மணி நேரம் திரைப்படம் ஒன்றைப் பார்ப்பது மனத்துக்கு நிறைவு அளிக்கலாம்.
3. கிரிக்கெட் போட்டிகள் பற்றிய கட்டுரை ஒன்றைப் படிப்பது நிறைவு அளிக்கலாம்.
4. சிறுகதை ஒன்றை எழுதி முடித்தால், அல்லது பதிவு ஒன்றை போட்டு விட்டால் திருப்தி ஏற்படும்.
5. பதிவுகளுக்குப் பின்னூட்டமோ, அல்லது வேறு நண்பர்களிடமிருந்து மின்னஞ்சலோ வந்திருந்தால் ஒரு இனம் புரியாத நிறைவு தெரிகிறது.
6. புத்திசாலித்தனமாக அலசி ஒரு பிரச்சனைக்கு மென்பொருள் நிரலில் தீர்வு எழுதினால் வருவதும் மனநிறைவு.
7. ஏழைச் சிறுவன் ஒருவனுக்கு சாப்பாடு போட்டால் வருகிறது மன நிறைவு.

இப்படிப் பட்டியலிட்டுக் கொண்டே போகலாம். ஒரு நாளைக்குப் போதுமான அளவு மனம் நிறையவில்லை என்றால் சோர்வு வந்து விடும். இது எல்லா மனிதருக்கும் பொருந்தும்.

தியாகராய நகருக்குப் போய் சரவணா ஸ்டோர்சில் புடவை வாங்கி விட்டு, முருகன் இட்லிக் கடையில் சாப்பிட்டு விட்டு வந்து விடுவது ஒரு குடும்பத்தலைவிக்கு அந்த நாளுக்கான மன நிறைவைத் தந்து விடலாம்.

அல்லது

தனது மகனின் பள்ளிக்குப் போய் ஆசிரியையைச் சந்தித்து எப்படி குழந்தை படிக்கிறான் என்று பேசி விட்டு வாரா வாரம் ஒரு மணி நேரம் வந்து வேறு ஒரு வகுப்பில் தனக்குப் பழக்கமான இணைய உலகம் பற்றிச் சொல்லிக் கொடுக்க முன்வருவதாக பள்ளித் தலைமையாசியையிடம் ஏற்பாடு செய்து கொண்டு விடுவது நிறைவைத் தரலாம்.

இந்த இரண்டில் எது சிறந்தது?

நேற்று இரவு இரண்டு மணி வரை பார்த்த பங்களாதேசம் - தென் ஆப்பிரிக்கா கிரிக்கெட் பந்தயம் குறித்து நண்பர்களுடன் இன்று காலை விலாவாரியாக விவாதிக்க முடிந்தது ஒரு மாணவனுக்கு மன நிறைவு தந்து விடலாம்.

அல்லது,

இயற்பியல் பாடத்தில் படித்த மாதிரி ஒன்றை அட்டைப் பெட்டிகளைப் பயன்படுத்தி உருவாக்க இரவு பன்னிரண்டு மணி வரை பிடித்தது. இன்றைக்கு கூடப் படிக்கும் மாணவ மாணவியரை அழைத்துக் காட்டி மகிழ்வது மன நிறைவைக் கொடுக்கலாம்.

எது சிறந்தது?

வார இறுதியைக் கொண்டாட நண்பர்களுடன் கிளப்பில் சீட்டாடி விட்டு சின்னதாக மது அருந்தி விட்டு காலையில் பத்து மணி வரை தூங்கி விட்டு தொலைக்காட்சியில் ஞாயிற்றுக் கிழமை காலை நிகழ்ச்சிகளில் மூழ்கி யிருப்பது ஒருவருக்கு நிறைவைத் தரலாம்.

அல்லது

அவரே அதிகாலையில் எழுந்து தனது அனுபவங்களை எழுதி முடித்து பத்து மணிக்கு அருகிலிருக்கும் இளைஞர் மன்றத்தில் போய் இளைஞர்களுடன் தனது அனுபவங்களைப் பகிர்ந்து கொள்வதில் நிறைவைக் காணலாம்.

எது சிறந்தது?

எதில் நாம் இன்பம், நிறைவு காண்கிறோம் என்பதை கவனிக்க வேண்டும். சின்னச் சின்ன அற்ப விஷயங்களில் மகிழ்ச்சி அடைந்து விட்டால் நிலவை அடைய ஆசை வராது.

சின்னச் சின்ன நிறைவுகளில் தமது மனதை செலுத்திக் கொள்கிறார்கள். நல்ல ஒரு சமையல் செய்து குழந்தைகள், கணவன் அதை பாராட்டி விடுவது, புதிதாக வாங்கிய சேலையை தோழி பார்த்து பாராட்டியது என்று மனத்தை நிறைத்துக் கொண்டால் பசி எங்கே இருக்கும்?

சாப்பிடப் போகும் நேரத்தில் கண்டதை சாப்பிட்டு வயிற்றை நிரப்பிக் கொள்ளாதே என்பார்கள் வீட்டில். 'சாப்பாட்டில் சரியான விகிதத்தில் ஊட்டச் சத்துக்கள் இருக்கும், நீ சாப்பிடப் போகும் நொறுக்குத் தீனி அந்தச் சாப்பாட்டுக்கு இடம் இல்லாமல் செய்து விடும், ஆனால் அதற்கு ஈடான சத்து கிடைக்காது. அதனால் வயிற்றை நிரப்பச் சரியான, தரமான உயர்வான உணவை நாடு' என்பது அதன் பொருள்.

அதே போலத்தான் மனதை நிரப்ப முயலும் மேல் சொன்ன பழக்கங்கள். நொறுக்குத் தீனிகளால் மனதை நிரப்பிக் கொண்டு விட்டால், சாப்பாட்டுக்கு இடம் இருக்காது, சாப்பாட்டுக்கு இடம் இல்லாமல், சரியாகச் சாப்பிடாமல் இருந்தால் உடல் ஆரோக்கியமாக இருக்காது.