பெண் ஏன் அடிமையானாள்?

யமுனா ராகவன் என்பவர் தமிழ்நாட்டில் ஒரு பெண்ணின் நிலையைப் பற்றி விரிவாக எழுதியிருந்தார். ஒரு தமிழ்நாட்டு ஆணின் மனதை ஊடுருவிப் படித்தது போல எழுதியிருந்தார். (எல்லா ஆண்களுக்கும் எல்லா குறிப்புகளும் பொருந்தா விட்டாலும்), இப்படி ஒரு பெண்ணின் மனதை எந்த ஆணாவது எழுத முடியுமா?

நான் பார்த்த வரையில் கான்வென்டில் படித்த பெண்களுக்கு ஒரு விடுதலை மனதளவில் கிடைத்திருக்கிறது. பெண் உடலின் மீது அசூயையோ, தான் ஆணை விடக் குறைந்தவள் என்ற தாழ்வு மனப்பான்மையோ முற்றிலும் இல்லாமல் செய்யும் நம்பிக்கை சிஸ்டர்கள் கொடுத்து விடுகிறார்கள் என்று தோன்றுகிறது.

சமூக அளவிலான மாற்றங்கள் இதைச் செய்து காட்டலாம்.

• சாங்காயில் சீனப் பெண்கள் ஆண்களுக்கு எந்தத் தாழ்வும் இல்லாமல் வாழ்கிறார்கள் என்று பார்த்திருக்கிறேன்.
  
• திருவனந்தபுரம் பெண்கள் குறிப்பாகவும், கேரளப் பெண்கள் பொதுவாகவும் இந்த விடுதலை பெற்றவர்கள் என்று ஒரு கருத்து உண்டு.
  
• உழைக்கும் வர்க்கத்தில் பெண்கள் இது போன்ற தளைகளில் கட்டுறாமல் இருப்பதாக தமிழ்ச்செல்வன் கேணி கூட்டத்தில் பேசும் போது குறிப்பிட்டார்.

இதைப் போன்று பல பெண்கள் இருந்தாலும், பெரும்பான்மை கோடிக்கணக்கான நடுத்தர வர்க்கப் பெண்கள் மனதளவில் அடிமைப் படுத்தப்பட்டு, அதனால் தினசரி வாழ்க்கையில் துன்புற்றுக் கொண்டுதான் இருக்கிறார்கள். அந்த துன்பங்களின் அழகான கொஞ்சம் நீளமான வெளிப்பாடாக அந்த இடுகை.

அந்த இடுகைக்கு வாக்களிக்க வேண்டும் என்ற காரணத்துக்காக உடனேயே ஒரு தமிழ்மண பயனர் கணக்கு பதிந்து கொண்டேன். masivakumar என்று ஏற்கனவே பெயர் எடுத்துக் கொள்ளப்பட்டிருந்ததால் பல நாட்கள் முயற்சித்து விட்டிருந்தேன். நேற்றைக்கு ma_sivakumar என்று பதிந்து கொண்டேன். முதல் முறையாக வாக்களித்தது இந்த இடுகைக்குத்தான்.