தொ(ல்)லைக் காட்சி

குணம் நாடி குற்றமும் நாடி அவற்றுள்
மிகை நாடி மிக்கக் கொளல்

தொலைக் காட்சியை எடுத்துக் கொண்டால் எது அதிகம், குணமா? குற்றமா?

தொலைக்காட்சியின் மோசமான விளைவுகளைப் பற்றி பேச்செடுக்கும் போது எல்லாம், நேஷனல் ஜியோகிராபிக், அனிமல் பிளானட் போன்ற ஓடைகள் அறிவை வளர்க்கும் நிகழ்ச்சிகளைத் தருகின்றன. குழந்தைகள் ஆங்கில நிகழ்ச்சிகளை பார்த்து ஆங்கில புலமையைப் பெருக்கிக் கொள்கிறார்கள், அதனால் தொலைக்காட்சியில் நல்லதும் கிடைக்கிறது என்ற வாதம் எழுகிறது.

மறு பக்கத்தில் நாள் முழுவதும் திரைப்படம் சார்ந்த நிகழ்ச்சிகள், மெகா தொடர்கள், மணிக்கு ஒரு தடவை செய்திகளை உடைக்கும் செய்தி ஓடைகள் என்று நம் மனதை வெள்ளக்காடாக்கும் வகையில்தான் நிகழ்ச்சிகள் உள்ளன.

இரண்டு ஞாயிற்றுக் கிழமைகளில் என் வீட்டில் பார்த்து விட்டேன். பெரியவரும், சிறியவரும் காலையில் ஜெயா டிவி, சன் டிவியில் பாட்டுப் போட்டி நிகழ்ச்சிகளில் ஆரம்பித்து, அரட்டை அரங்கம், 11.30 தமிழ்ப் படம் சன் டிவியில், சன் டிவியில் செய்தி வாசிக்கும் போது1 மணி படம் கே டிவியில், அப்புறம் திரைச்சோலை (சன் டிவியில்), கடைசியாக மாலைத் திரைப்படம் என்று இடைவிடாமல் தொலைக்காட்சி வரவேற்பறையை ஆக்கிரமித்திருந்தது.

குழந்தைகள் போகோ ஓடையிலும், தாய்மார்கள் மெகா தொடர்களிலும், மாணவர்கள் கிரிக்கெட் ஒளிபரப்பிலும், இதை எல்லாம் தாண்டிப் புனிதமான அப்பாக்கள், அண்ணன்கள் செய்தி ஓடைகளிலும் விட்டிப் பூச்சி போல விழுந்து கொண்டிருக்கிறோம்.

மனித வரலாற்றில் இது வரை பார்த்திராத ஒரு ஆக்கிரமிப்பு தொலைக்காட்சி. ஒரு நாளிதழ் வாங்கினால், நாம் அதைக் கையில் எடுத்து படித்து, மூளைக்கு வேலை கொடுத்தால்தான் சரக்கு மனதில் பதிகிறது. தொலைக்காட்சியிலோ, கையில் தானியக்கியுடன் உட்கார்ந்து கொண்டால் கண்களையும், காதுகளையும் முடமாக்கி விட்டு நேரடியாக மூளைக்கு காட்சிகளையும், ஒலிகளையும் அனுப்பி வைக்கின்றன நிகழ்ச்சிகள். திரைப்படக் கொட்டகையில் அத்தகைய நுட்பம் இருந்தாலும் அது மூன்று மணி நேரத்தில் ஓய்ந்து விடுகிறது. திரைப்படம் பார்க்க வீட்டிலிருந்து தயாராகி, உடை உடுத்தி அரங்குக்கு பயணித்து, சீட்டு வாங்கிக் காத்திருந்து மூன்று மணி நேரம் நமது மனதை வெளி ஆதிக்கத்துக்கு உட்படுத்துகிறோம். விடுமுறை நாள் முழுவது, மாலை முழுவதும், இரவு கண் விழித்து என்று வாழ்க்கையில் எந்த வித முயற்சியும் இல்லாமலேயே நுழைத்து விடக் கூடிய தொலைக்காட்சி குடும்பத்துக்கும், சமூகத்துக்கும் நீண்ட கால ஊறுகளை விளைவித்து வருகிறது.

குழந்தைகளுக்கான நிகழ்ச்சிகளில் கூட விளம்பரங்கள். இள மனங்களை சீக்கிரமே பிடித்து விடுகிறார்களாம். இங்கிலாந்தில் குழந்தைகளை குறிப்பாகச் சுட்டி எந்த விளம்பரமும் செய்யப்படக் கூடாது என்ற சட்டமே உள்ளதாம்.

90களின் மத்தியில் தொடங்கிய இந்தப் போக்கின் முழு விளைவுகள நாம் பார்க்க ஆரம்பித்துள்ளோம். இனி வரும் ஆண்டுகளில் தொலைக்காட்சிகளால் விளைந்த சமூக குடும்ப ஊனங்கள் வெளியில் தெரிய வரும்.

அறிவு சார்ந்த நிகழ்ச்சிகள் பார்க்க வேண்டுமா அதற்குரிய குறுந்தகட்டை கடையில் போய் வாங்கி குறுந்தகடு இயக்கியில் போட்டுப் பாருங்கள். குழந்தைக்கு ஆங்கில அறிவுக்கு கார்ட்டூன்களும் கூடக் கடையில் கிடைக்கின்றன.

வீட்டின் கேபிள் இணைப்பை துண்டித்து விட்டு, ஒரு டிவிடி பிளையர் வாங்கி தொலைக்காட்சி பெட்டியுடன் இணைத்து விடுங்கள்.

செய்திகளை அறிந்து கொள்ள செய்தித் தாள்கள் இரண்டு மூன்று வாங்குங்கள். கேளிக்கைக்கு பாடல்களைக் கேளுங்கள், வெளியில் சென்று திரையரங்குகளில் திரைப்படம் பாருங்கள்.

தொலைக்காட்சி என்ற ஆக்கிரமிப்பை வீட்டுக் கூடங்களிலிருந்து விரட்டி அடியுங்கள். உங்கள், குழந்தைகளின், சமூகத்தின் எதிர்காலம் கண்டிப்பாக இன்னும் சிறப்பாக மாறி விடும்.