தொழில் நிறுவனங்களின் தர்மச் செலவுகள்

பில் கேட்ஸ் எய்ட்சு நோயாளிகளின் நலனுக்காக இத்தனை பில்லியன் டாலர் கொடுத்தார். இன்ஃபோசிஸ் சார்ந்த ஒரு அமைப்பு, பள்ளிக்கூடங்களுக்கு, மருத்துவமனைகளுக்கு தானம் செய்கிறது. இவை எல்லாம் வர்த்தக நோக்கில் ஓடும் இந்த உலகில் நல்ல உள்ளங்களும் உள்ளன என்பதைக் காட்டும் சில செயல்கள்.

கொஞ்சம் பொறுங்கள். இவை உண்மையிலேயே சமூகத்துக்கு நல்ல பணிகள்தானா? இந்தப் பணம் வேறு எங்காவது இன்னும் நல்லவிதத்தில் பயன்படுமா?

ஒர் வணிக/தொழில் நிறுவனத்துக்கு லாபம் எங்கிருந்து வருகிறது? செலவுகள் எல்லாம் போக, விற்ற விலையின் மீதம் தான் லாபம். இந்த லாபத்தை எடுத்துதான், இப்படி செலவு செய்கிறார்கள், தர்மத்தை வளர்க்கிறார்கள்.

ஆனால், பொருளாதார விதிகளின் படி சரியாக இயங்கும் ஒரு சந்தைப் பொருளாதரத்தில் அதிகப்படியான லாபமே இருக்க முடியாது. அதாவது, பொருட்களை வாங்கும் போதும் விற்கும்போதும், சமமாகப் போட்டியை ஒரு நிறுவனம் சந்தித்தால் வரும் பணம் செலவுகள் எல்லாம் போக எதுவும் மிஞ்சாது.

பணம் வரும் வழி ஒரே வழி - வாடிக்கையாளர்கள் பொருட்களுக்கு கொடுக்கும் விலை.
பணம் போகும் வழிகள் - சம்பளம்/கூலி, மூலப் பொருட்களுக்கான விலை, தொழிற்கூட வாடகை, மின்சாரம், வங்கி அல்லது பிற கடன்களுக்கான வட்டி, முதலாளி முதலீடு செய்த பணத்துக்கான வருமானம் (இன்னும் சில).

இந்த இரண்டு வகைகளையும் கழித்தால் எதுவும் மிஞ்சக் கூடாது. ஒரு நிறுவனத்துக்கு தானம் தருமம் செய்யுமளவு பணம் மிஞ்சுகிறது என்றால் அந்தப் பணம் செலவுக் கணக்கில் சரியான விலை கொடுக்காததாலோ, வரவுக் கணக்கில் அதிகமான விலை பெற்றதாலோ வந்திருக்கலாம்.

ஒரு ஊழியரை வேலையில் வைப்பதால் நிறுவனத்தின் வருவாய் எவ்வளவு அதிகமாகிறதோ அவ்வளவையும் சம்பளமாகக் கொடுப்பது பொருளாதார விதி. வேலைக்கு எடுக்கும் போது, ஊழியர் எவ்வளவு காசுக்கு ஒத்துக் கொள்கிறாரோ அந்த சம்பளத்தைக் கொடுத்து மீதியை சேமித்துக் கொள்வது இன்றைய பொருளாதார நடப்பின் விதி. ஊழியர் ஏன் குறைந்த ஊதியத்தை ஒத்துக் கொள்ள வேண்டும் ? இல்லையென்றால் வீட்டில் அடுப்பெரியாது. வரிசையில் நிற்கும் அடுத்தவன் இந்த வேலையில் அமர்ந்து கொள்வான்.

இதே மாதிரி, மூலப் பொருள் வாங்கும் போது, விவசாயிக்கு காசு தேவை என்று புரிந்து கொண்டு, என்ன விலைக்கு வாங்க முடியுமோ அந்த விலையில் விளை பொருளை வாங்கிக் கொள்வது நிறுவனத்தின் "லாபம்" அதிகரிக்க இன்னொரு வழி.

சந்தையில் ஏகபோக ஆதிக்கத்தினால், நுகர்வோருக்கு கொடுக்க வேண்டிய விலையை விட ஏற்றி விற்பது இன்னும் ஒரு வழி.

இது எல்லாம் முடிந்து, அரசுக்கு வரி செலுத்தும் நேரம் வரும்போது கணக்குகளை மாற்றியமைத்து வரி அளவைக் குறைத்துக் கொள்வது இன்னும் ஒரு வழி.

இப்படி எல்லாம் சேர்ந்த லாபப் பணத்தைத்தான், மைக்ரோசாப்டுகளும், இன்ஃபோசிஸ்சுகளும், டாடாக்களும் பொதுநலத் தொண்டாக செலவளிக்கின்றன. அப்படிச் செலவளிப்பதைப் பாராட்ட வேண்டியதுதானே!

வணிக நிறுவனம் ஏற்படுத்தியதின் நோக்கம், தொழில் செய்வது. அதற்குத் திறமையுள்ளவர்கள் அங்கு வேலை செய்கிறார்கள். சமூகத்துக்கு என்ன தேவை என்று அவர்கள் எப்படி முடிவு செய்ய முடியும்?

அப்படி முடிவு செய்யத்தான் அரசாங்கமும், அரசியல் தலைவர்களும் உள்ளனர். நிறுவனத்தில் அதிகப்படியாக வரும் லாபத்துக்கு மூடி மறைக்காமல் முழுவதாக வரி செலுத்துவது, மிஞ்சி இருப்பதை பங்கு தாரர்களுக்கு பகிர்ந்தளித்து, அவர்களும் தம்முடைய வருமான வரியைச் சரியாகச் செலுத்துவதும்தான் இவர்கள் செய்யும் மிகப் பெரிய சமூகத் தொண்டாக இருக்கும்.

அப்படியும் வரும் லாபம் மிக அதிகம் என்று கருதினால், ஊழியர்களுக்கு ஊதிய உயர்வு, வாடிக்கையாளருக்கு குறைந்த விலை அல்லது அதிகமான தரம் அல்லது மூலப் பொருள் தருபவர்களுக்கு கொஞ்சம் அதிக விலை என்று ஆரம்பிக்கலாம்.